القصة الكاملة لاعتداء كويتي على عامل مصري

واقعة الاعتداء على الشاب وليد صلاح أثارت ردود فعل واسعة- مواقع التواصل

القصة الكاملة لاعتداء كويتي على عامل مصري

يقول: وليد صلاح، الشاب المصري الذي تعرض مؤخرا لاعتداء في الكويت

كلكم بتلومونى وبتشتمونى علشان قبلت على كرامتى إن الكويتى يضربني ووقفت ساكت وإيدي في جنبي بعد كل قلم مستني القلم إللي بعده !!

لعلمكم أنا ماقبلتش إنه يضربني

أنا محستش أصلا بالضرب ده !!

أصل انتوا ماتعرفوش حاجة ، ماتعرفوش إن أنا وقتها كنت بفكر فى إيه ؟

فى الحلم إللى ضاع

فى السجن إللى مستنينى لو رجعت مصر

فى حسرة أمى وصدمة أبويا

فى كسرة أخواتى

محدش يكلمنى عن الكرامة !

أنا خلصت تعليم ومكنتش لاقى أى شغل وأنا واحد فقير والفقر بينهش فينا نهش الكلاب ، لا عارف أشترى قميص ولا عارف أشترى جزمة ، مش لاقى أى شغل ولما لقيت شغل يادوب يكفى مصاريفى جات الكورونا والراجل طردنى علشان يخفف العمالة !!

وفجأة واحد يعرض عليك تسافر الكويت !!

عارفين كان المطلوب كام ؟؟؟

خمسين ألف جنيه

طب عارفين كان معايا منهم كام ؟؟؟

ولا مليم

طبعاً ده حلم كبير هينقلنى أنا وأبويا وأمي وأخواتي من الفقر ، هريح أبويا وأمي ، هجهز أخواتى البنات ، هشترى إللى نفسي فيه

طب عارفين جبت الفلوس دي إزاى ؟؟

ماعرفتش أجيبهم طبعاً ، وهو إللى زي حلاتي مين هيسلفه خمسين ألف جنيه ؛ أنا كتبت بيهم ١٠ إيصالات أمانة وفوقهم إيصال على بياض

محدش يكلمنى عن الكرامة !!

عارفين يعنى إيه بدل ما أرجع لأهلي بشنطة هدايا أرجع لهم بديون وهم تقيل واحنا أصلا ما عندناش أي حاجة نبيعها !!

أنا ماحستش بأى ضرب

أنا كنت متبنج ببنج الفقر وخراب البيت إللي منتظرني

الراجل ضربني

وهو حر وأنا أجير

هو قادر وأنا ضعيف

هو فى بلده وأنا غريب

هو صاحب البيت وأنا ضيف عنده

لأ بس هو ماضربنيش علي فكرة ، إللى كان بيضربنى الفقر والعوزة والعجز والديون

إللى كان بيضربنى الراجل إللى طردنى من الشغل في مصر

إللى كان بيضربنى إيصالات الأمانة إللي هتحبس بسسبها

إللى كان بيضربنى الظلم والقهر

اللى كان بيضربنى الكوسة والمحسوبية إللي في بلدي

أنا محدش ضربني .. أنا جاي مضروب جاهز.

وأوضح صلاح، خلال مداخلة هاتفية أمس الأحد في عدة قنوات مصرية، أنه رفض رفع يده على الشخص الكويتي المعتدي عليهن وذلك لكبر سنه.

وأضاف: “الناس اللي بتقولي مضربتش الراجل ليه.. أحب أقولهم احنا في دولة قانون، والقانون في الكويت بينصر المظلوم”.

وتابع: “ماينفعش أمد أيدي على راجل قد أبويا وهو معاه مراته وابنه.. دي حاجة وحشه في حقهم”.

من جهتها، طالبت نبيلة مكرم، وزيرة الهجرة وشؤون المصريين بالخارج، بحذف فيديو الاعتداء حفاظا على كرامة المصريين بالخارج.

ودعت الوزيرة وليد صلاح إلى عدم التنازل عن حقه، قائلة: “لا بد أن يتمسك وليد بحقه القانوني، وإذا تنازل عن حقه نحن سنطالب به، المواطن في الخارج سفير لدولته، وحق المصري يعود إليه بالإجراءات القانونية، وهناك الكثير من الإجراءات تعيد حق المواطن المصري”.

وأكد قنصل عام مصر بالكويت، هشام عسران، أن الحادث فردي لا يمثل متانة العلاقات الثنائية بين الشعبين واستقرار مئات الآلاف من العمالة المصرية بدولة الكويت.

وأوضح القنصل المصري أنه تم إلقاء القبض على المعتدي وتم تسجيل القضية جنحة، وتجري متابعة القضية، لافتا إلى تواصل الجهات المعنية بالكويت مع الشاب المصري الذي تم الاعتداء عليه.

كذلك أعلنت جمعية “صباح الأحمد” التابع لها المتجر تضامنها مع الشاب المصري، يتقدمهم رئيسها ناصر ذعار العتيبي.

المصدر: وكالات

#الشابالمصري #الكويت #مصر #وليدصلاح